Ang Mahiwagang Manok ni Mang Kulas - Modyul

Here is a story of a poor farmer who was given a chance to have a better life. Was he able to make the most of it? Find out in the story.

Ang Mahiwagang Manok ni Mang Kulas

        Si Mang Kulas ay isang mabuti at masipag na magsasaka. Siya ay may asawa’t apat na anak at ang tanging pangarap niya sa buhay ay maiahon sa kahirapan ang kanyang pamilya. Araw-araw ay sinisikap niyang magtrabaho nang mabuti upang dumami ang kaniyang ani. Ngunit kahit na anung pagsisikap niya ay hindi niya talaga kinakayang kumita nang malaki. Lingid sa kanyang kaalaman ay magbabago na ang kaniyang kapalaran.

        Isang araw habang papunta sa bukid si Mang Kulas ay may nadaanan siyang matandang babae. “Anak, baka puwedeng bilhin mo na lang ang manok kong ito para naman makauwi na ako. Napakaalayo pa kasi ang palengke at pagod na pagod na ako,” ang nagmamakaawang sabi ng matanda.

        “Naku, Lola, maliit na halaga lang po ang dala ko ngayon. Sa inyo na lamang po ito. Iuwi n’yo na lang po ‘yang manok n’yong yan upang makapagpahinga na kayo,” ang tugon naman ni Mang Kulas habang iniaabot ang pera sa matanda.

        “Salamat, Anak. Napakabuti mo. Sa iyo na ang manok na ito,” mangiyak-ngiyak na nasabi ng matanda at ibinaba niya ang manok sa paanan ng magsasaka.

        Dinampot ni Mang Kulas ang manok. Laking gulat niya nang bigla na lang naglaho ang matandang babae. Naiwan lamang ang manok na kanyang tangan.

        Iniuwi na lamang ni Mang Kulas ang manok. Naisipan niya itong katayin upang makahigop naman ng mainit na sabaw ng tinola ang kanyang pamilya. Iniwan niya sandali ang manok upang kunin ang kanyang tabak ngunit nang kanya itong binalikan ay nakita niyang wari nangingitlog ito. “Aba! Nangingitlog ang manok. Tingnan mo nga naman ang suwerte. Sige, bago kita katayin ay ilabas mo muna ang itlog mong ‘yan.”

        Laking gulat ni Mang Kulas nang makita niya ang lumabas na itlog. “Nananaginip ba ako?! Brilyante ang itlog ng manok!” ang sigaw ni Mang Kulas. Tuwang-tuwa ang mahirap na magsasaka dahil alam niyang malaki ang maitutulong ng brilyanteng itlog sa kanyang pamilya.

        Nadagdagan pa ang kanyang kaligayahan nang matagpuan niya ang isa pang brilyanteng itlog isang buwan matapos lumabas ang unang itlog. Natuklasan niyang buwan-buwan pala kung mangitlog ang mahiwagang manok.

        Unti-unting bumuti ang buhay ng pamilya ni Mang Kulas. Nakabili sila ng mas malaking bahay at napuno ito ng mga makabagong kasangkapan. Nakapaglakbay rin ang kanyang mga anak sa malalayong lugar.

        Hindi naglaon ay hindi na naging sapat ang salaping napagbibilhan ng mga brilyanteng itlog. Masyado na kasing maluho ang pamumuhay ng pamilya ni Mang Kulas. Dagdag pa rito ay nalulong si Mang Kulas sa pagsusugal at iba pang bisyo.

        Isang araw ay umuwing talunan sa sugal si Mang Kulas. Gustong-gusto niya pang bumalik sa sugalan upang makabawi sa kanyang malaking pagkatalo. Para magkapera ay naisip niyang

magbenta ng brilyanteng itlog. Ngunit wala na palang natira. Nag-isip siya ng paraan upang mas mapadalas ang pangingitlog ng manok. Naisip niyang kapag pinakain niya nang pinakain ang manok ay baka mangitlog ito sa oras ding iyon.

        Ganoon nga ang kanyang ginawa. Pinakain niya nang pinakain ang manok hanggang sa ito’y mabundat. At dahil dito ay namatay ang kawawang manok.

        Sising-sisi si Mang Kulas sa kanyang ginawa. Nang dahil sa kasakiman, ang manok ay pumanaw. Ngayon ay mas lalo pa silang naghirap dahil sa laki ng kanyang utang.

Download the module here.